Cada día son más los organismos y instituciones de tou tipu «qu’arreblaguen» al e-learning (formación online) al traviés d’un LMS. Un LMS (o Sistema de Xestión del Aprendizaxe) nun ye otros qu’una plataforma web cola que vamos poder alministrar tolo relativo a los conteníos de los cursos, los usuarios, les comunicaciones dientro del aula virtual, les actividades y un llargu (y variable) etcétera.
Lóxicamente, lo primero que habría de definir son les necesidaes específiques que tien la entidá que quier implantar una plataforma e-learning. Y ye qu’eses necesidaes pueden variar dependiendo l’ámbitu nel que se quier implantar la formación online. Nun ye lo mesmo un organismu públicu qu’una empresa, como nun ye lo mesmo un centru de formación especializao nuna materia determinada qu’una universidá. Los potenciales veceros de tala plataforma pueden ser dende’l públicu en xeneral hasta los empleaos d’una empresa dala. Y éstos pueden ser pilotos d’avión, persones desempleaes o extranxeros que quieren deprender l’idioma del país nel que residen. Poro, l’abanicu de posibilidaes y/o necesidaes nun tien fin.
Estes llínees nun quieren dar una rempuesta global, nin siquieramente xenérica, a una casuística tan abondosa. Hai munches plataformes LMS nel mercáu, delles de software propietario como Design2Learn, Blackboard o eCollege. Y tamién esisten plataformes basaes en códigu abiertu como Atutor, .LRN, Dokeos, etc.
La mio esperiencia nos últimos años fai que trabaye davezu con un LMS en particular: Moodle. To paez indicar que Moodle se afitose como’l LMS más popular ente los usuarios de tol mundu, como muestra esta infografía. Sin falta entrar en comparances y muncho menos en descalificaciones d’otras alternatives, sí me prestaba dar dellos argumentos que faen de Moodle una opción amañosa a la hora d’implementar un LMS. Son estes:
- Moodle ye software llibre, lo qu’implica un abaratamientu na implementación del mesmu: Bona parte de les funcionalidaes necesaries vienen «de serie» y de baldre na instalación de Moodle. A partir d’ehí somos los profesionales los que afayamos Moodle a les necesidaes de la empresa o entidá que quiera usalu. Y lo facemoslo tanto a nivel funcional como de diseñu o de conexón con otres ferramientes.
- Moodle tá diseñáu a costa fecha pal deprendizaxe en base al constructivismu pedagóxicu. Esto potencia la cooperación y l’ntercambiu ente’l profesoráu y l’alumnáu.
- Moodle permite organizar los cursos d’una manera coherente al traviés de temes y elementos fáciles de conocer pa la comunidá educativa. Amás permite controlar el desendolcu de les unidaes didáctiques y los conteníos de cara a xenerar alderiques y reflexones en grupu (ente’l propiu alumnáu o colos tutores)
- Moodle ye flesible a la hora de compartir contenidos de tou tipu. Documentos, vídeos, actividaes, etc. Tamién ye fácil de conectar con ferramientes web y redes sociales como Youtube, Google Docs, Dropbox, Twitter, RSS, etc. Y, por supuesto, va permitinos llantar paquetes nel estándar SCORM.
- Moodle ye fácil d’usar. Cola so estructura modular, menús desplegables, testos desplicativos y una usabilidá bien cuidada, Moodle tá al algame de cualquiera. Una vez daprendíos los conceptos básicos, xestionar Moodle ye un xuegu pa neños.
Poro, Moodle ye una opción mui amañosa a la hora d’implantar acciones formatives n’internet, Tamos énte una ferramienta potentísima y adaptada a les tendencies más nueves y a les posibilidaes de la web. Y, amás… vamos aforrar dineru.
Otru día falamos de las ferramientes d’autor.
